الشوق لك ما يعرف أوقات واسباب
الشوق لك فطرة وربي فطرها
شوق(ن) يفوق الوصف ما ضمه كتاب
فيه المشاعر زاهيات(ن) صورها
شوق(ن) عظيم(ن) ما تصوره الالباب
لو بكتبه باقلام يقضي حبرها
شفت السيول اليا غزت سهل وهضاب
والا السحايب لاستهلت مطرها
السيل شوقي من فؤادي لك انساب
والا المطر زخات حب(ن) نثرها
ياللي غيابك ذوب القلب وانصاب
جفت عروقه واشتكتلي فقرها
يشتاق لك قلب(ن) من الحب ما تاب
ذاب بحنينه والليالي سهرها
يرقب سماها والقمر تو ماغاب
يتخيلك في صورته يا قمرها
ياروح روحي يا بعد كل الاحباب
يا نور عيني يا ضياها ونظرها
يا ساكن بين الحنايا والاهداب
يا طب روحي لا غشاها كدرها
لو جيت ابعرب دنيتي حق الاعراب
المبتدا إنت ( و) إنت خبرها .
